Avokati i kryebashkiakut të Tiranës, Erion Veliaj, Plarent Ndreca, ka kundërshtuar në Gjykatën Administrative prapësimet e Këshillit të Lartë të Prokurorisë, lidhur me kërkesën për moslegjitimimin e Veliajt si palë paditëse në procesin gjyqësor ndaj prokurorit të posaçëm Ols Dado.
Sipas qëndrimit të Veliajt, emërimi i Dados si prokuror në vitin 2008 është kryer në kundërshtim me ligjin, duke e bërë, sipas tij, dekretin presidencial të pavlefshëm dhe për rrjedhojë edhe ushtrimin e detyrës nga ana e tij të paligjshëm.
Në seancë, Ndreca ka akuzuar KLP-në se, sipas tij, po mbron një situatë të paligjshme dhe po përpiqet të pengojë legjitimimin e padisë. Ai ka theksuar se padia është ngritur për shkak të cënimit të interesave të Veliajt, duke argumentuar se atij i është kufizuar liria dhe se Bashkia e Tiranës ndodhet pa drejtuesin e saj.
Ndreca ka deklaruar gjithashtu se KLP, sipas tij, po mban qëndrime kontradiktore në mbrojtjen e saj dhe po tenton të mbyllë çështjen duke mos lejuar shqyrtimin e plotë të pretendimeve të ngritura në gjykatë.
