Dje policia njoftoi se në Cerujë të Elbasanit, në një humnerë gjeti një trup të pajetë që dyshohet se i përket Eglant Koçit, i zhdukur pa gjurmë prej 4 qershorit. Ekspertët zbuluan më vonë gjatë orëve të natës, teksa kryen ekspertizën se viktima ishte qëlluar me plumb në kokë dhe më pas është hedhur në humnerë, prej nga u nxor nga alpinistët e RENEAS.
Sipas të dhënave paraprake, për faktin se Koçi është i vetmi person i denoncuar i zhdukur kohët e fundit dhe të gjitha lëvizjet e dyshuara të autorit i kanë çuar hetuesit në zonën e Elbasanit, dyshohet se trupi i pajetë është i tij, ndonëse familjarët nuk kanë mundur të identifikojnë dot për shkak të dekompozimit. Për këtë arsye, është vendosur të kryhet analiza e ADN-së dhe nëse rezulton e përputhshme me prindërit, trupi do t’i kthehet familjes.
Koçi u mor zhduk më 4 qershor dhe më vonë hetimet zbuluan se ai u mbajt peng në një ambient përballë Drejtorisë së Policisë së Shtetit. Policia ka shpallur në kërkim si autor të dyshuar mikun e tij, Armand Shakaj. Sipas hetuesve, Shakaj u filmua duke nxjerrë nga ambienti i tij një qese të zezë brenda së cilës kishte fshehur trupin e shokut të tij.
Shakaj u shpall në kërkim, ndërsa Enea Zyferi, kamarieri i lokalit të tij, u arrestua për përkrahje të autorit të krimit, pasi kishte fikur energjinë elektronike dhe kishte larë automjetin që u përdor për të zhdukur trupin. Koçi dyshohet të jetë vrarë për shkak të se menaxhonte portofole të kriptomonedhave.
