Policia e Tiranës ka proceduar penalisht 23 protestues të tjerë pas tubimit të zhvilluar një ditë më parë përpara Kryeministrisë.
Sipas njoftimit zyrtar, nga verifikimet e kryera ka rezultuar se disa pjesëmarrës kanë organizuar dhe drejtuar tubimin, duke penguar qarkullimin e lirë të mjeteve në disa akse rrugore të kryeqytetit, në kundërshtim me itinerarin e njoftuar paraprakisht.
Shërbimet e Drejtorisë Vendore të Policisë Tiranë, krahas garantimit të rendit gjatë tubimit, kanë kryer veprime hetimore dhe procedurale për identifikimin e personave që dyshohet se kanë vepruar në kundërshtim me ligjin gjatë protestës. Në përfundim të verifikimeve, janë proceduar penalisht 23 protestues të tjerë, ndërsa vijon puna për identifikimin e personave të tjerë të përfshirë.
Materialet procedurale do t’i referohen Prokurorisë për veprat penale “Organizimi dhe pjesëmarrja në grumbullime e manifestime të paligjshme”, “Prishja e rendit dhe qetësisë publike” dhe “Pengimi i qarkullimit të mjeteve të transportit”.
