Policia e Tiranës ka finalizuar operacionin e koduar “Gjeneralitetet”, duke zbuluar një laborator për falsifikimin e dokumenteve në fshatin Rrushkull të Durrësit. Në pranga kanë rënë Hashim Markaj, 53 vjeç, djali i tij Sulejman Markaj, 24 vjeç, si dhe Elidon Vladi, 37 vjeç.
Sipas hetimeve, të arrestuarit kishin përshtatur banesën e tyre për prodhimin e dokumenteve të falsifikuara, si diploma, certifikata, vërtetime gjyqësore dhe dokumente aplikimi për institucione të ndryshme, kundrejt pagesave që varionin nga 3 mijë deri në 5 mijë euro.
Gjatë kontrolleve, policia sekuestroi 46 dokumente të dyshuara të falsifikuara, 2 vula false, 6 telefona celularë dhe 3 kompjuterë që dyshohet se përdoreshin për këtë veprimtari kriminale.
Hetimet vijojnë për identifikimin e personave të tjerë që mund të jenë përfshirë në këtë aktivitet, ndërsa materialet procedurale i janë referuar Prokurorisë së Tiranës për veprime të mëtejshme.
