Kreu i Partisë Demokratike, Sali Berisha, gjatë një takimi me demokratët në Fier, akuzoi qeverinë për keqmenaxhim dhe korrupsion, duke theksuar se fondet publike shkojnë në xhepat e qeveritarëve. Ai premtoi një ndryshim rrënjësor me ardhjen në pushtet, përfshirë një minimum jetik prej 200 eurosh për pensionistët dhe shtresat në nevojë.
Berisha deklaroi:
“Vetëm një kolonialist që urren kombin që ka pushtuar, mund të lërë 16 milionë euro për 780 mijë pensionistë. Ne do të ndryshojmë jetën e 57% të pensionistëve që nuk marrin pension të plotë dhe do të mbështesim çdo qytetar të papunë apo në ndihmë ekonomike.”
Ai shtoi se buxheti aktual i shtetit, ndonëse dyfish më i lartë se në kohën e qeverisjes së tij, keqpërdoret për projekte me kosto të fryra:
“Rrugët sot ndërtohen me çmime 10-fish më të larta. Çmimet e ndërtimit janë rritur 35%, por këta i rrisin kostot me 1000%. Paratë janë, por vidhen.”
Berisha preku edhe projektin e Portit të Durrësit, duke e cilësuar si burim korrupsioni:
“Porti i Durrësit po mbyllet për të ndërtuar një port të ri në Porto Romano me 1.3 miliardë euro. Këto para nuk do shkojnë për projekte të panevojshme, por për rritje pagash dhe pensionesh.”
Duke përmendur të arriturat e qeverisjes së tij, Berisha tha:
“Me një buxhet më të vogël, ndërtuam 11 mijë kilometra rrugë dhe dyfishuam pagat e pensionet. Këto arritje tregojnë se paratë mund të menaxhohen në shërbim të qytetarëve.”
Ai e mbylli fjalimin duke theksuar se ky është vetëm fillimi i një plani të madh për të rikthyer mirëqenien në Shqipëri.
