Ervin Hoxha, drejtuesi politik i njësisë 1 në Tiranë, që kur i duhet qeverisë bën dhe ministrin e Brendshëm, ka shprehur sot shqetësimin për protestën e paralajmëruar përpara Ministrisë së Brendshme. Kërkesa dy partive të vogla përqendrohet tek nisja e një hetimi serioz për zbardhjen e ngjarjes ku u përfshi një oficer policie që tentoi të vetëvritej pas një rasti ku u ndalua djali i biznesmenit Samir Mane.
Ngjarja, e cila u mbajt e fshehtë për ditë me radhë, u denoncua nga një numër shumë i vogël mediash, ndërkohë që Policia e Shtetit, Ministria e Brendshme dhe Prokuroria heshtën, duke hedhur më shumë tym mbi një çështje që së paku meriton transparencë. Në reagimin e tij të turpshëm për një oficer me uniformë, Ervin Hoxhaj merr përsipër të gjykojë motivet e protestës dhe shprehet i sigurt se “rasti në fjalë është i qartë e i dokumentuar dhe e gjitha është një furtunë në gotë”.
Në fakt, jo vetëm që nuk është i qartë, por deri më sot nuk ka asnjë reagim nga asnjë prej institucioneve përgjegjëse. Përfshirë dhe Ministrin e Brendshëm, që veç furtunës, duket se e sheh plot gotën e qeverisë si patronazhist model i PS.
Ervin Hoxha, Ilir Proda, prokurori që ka ndjekur çështjen dhe i gjithë zinxhiri përgjegjës për këtë ngjarje të rëndë, kanë detyrim t’i japin përgjigje disa pyetjeve thelbësore: • A e ka urdhëruar ndonjë epror policin që tentoi vetëvrasjen të ndalojë djalin e biznesmenit? • Pse ai u thirr jo zyrtarisht të nesërmen në zyrat e Agjencisë së Mbikëqyrjes Policore dhe u pyet për orë me radhë? • Pse nuk hetohet e gjithë ngjarja, përfshirë dhe mesazhet që oficeri i policisë i ka dërguar të birit pak minuta para se të ndërmarrë aktin ekstrem?
Kur t’i japë përgjigje me transparencë këtyre dhe të tjerave pyetje, Ministri i Brendshëm mund të dalë e të flasë për ngjarjen apo për protestën e paralajmëruar. Deri atëherë, është në nderin e tij të nisë hetimet serioze për të zbardhur të vërtetën e të mos merret me protestat, të cilat çdokush ka të drejtë t’i organizojë. Për partinë e Ervin Hoxhës, jeta e individit nuk ka vlerë sa “parimet” e partisë, por për një vend demokratik, jeta e çdo individi është më e rëndësishme se çdo lloj propagande patronazhistësh.
