Në vitin e 33-të aktiv në jetën politike Sali Berisha u premton për të disatën herë se do të zgjidhë çështjen e ish të përndjekurve politikë. Sot në selinë e Partisë Demokratike, kreu i kësaj partie, Sali Berisha po zhvillon një takim me drejtuesit e Departamenteve të ish-të Përndjekurve Politikë pranë degëve të Partisë Demokratike. Gjatë fjalës së tij, kreu i PD u shpreh se problematikat e jashtëzakonshme të trashëguara nga diktatura, me gjithë përpjekjet e përbashkëta, ende nuk kanë marrë përgjigjen e merituar. "Një nga qëllimet më kryesore të kësaj mbledhje është të kërkojë nga ju të hartojmë programin e ri të PD, pasi marrëveshja e vitit 2006, që ne patëm me të përndjekurit politikë, marrëveshje e pranuar pikë për pikë siç u paraqit, ajo marrëveshje në disa aspekte është tejkaluar dhe kërkohet të bëhet edhe një rishqyrtim i të gjithë detyrimeve që shoqëria ka ndaj jush”- u shpreh Berisha. Ndaj dhe ai premtoi që, programi i PD për të përndjekurit, të internuarit, të burgosurit, të pushkatuarit, do të ridimensionohet plotësisht. Detyrimet e shoqërisë shqiptare ndaj kësaj shtrese do të njihen, siç janë njohur në masë të caktuar, dhe do të plotësohen. "Po, nuk mund të ketë paqe të vërtetë sociale pa i dhënë përgjigjen e merituar problemit të të përndjekurve politikë dhe pronarëve. Jo."-tha Berisha.
