Prej më shumë se një dekade, Jack Nicholson është larguar nga kinemaja dhe pothuajse është zhdukur nga jeta publike. Aktori legjendar, tashmë 89 vjeç, jeton larg kamerave, premierave dhe vëmendjes që e shoqëroi për një gjysmë shekulli. Por Michael Douglas, një prej miqve të tij të vjetër, ka dhënë një lajm qetësues për gjendjen e tij.
Gjatë një aktiviteti në Swansea, ku po promovonte librin autobiografik One Helluva Ride, Douglas u pyet për Nicholson, me të cilin kishte bashkëpunuar në filmin e famshëm One Flew Over the Cuckoo's Nest të vitit 1975.
Douglas konfirmoi se Nicholson është mirë, por nuk punon më dhe është tërhequr nga jeta publike. Ai tregoi se vazhdon ta takojë dhe se aktori e kalon kohën i qetë në shtëpinë e tij, duke shëtitur me pantofla.
Nicholson nuk e ka shpallur kurrë zyrtarisht pensionimin, por filmi i tij i fundit mbetet How Do You Know, i vitit 2010. Daljet e tij publike janë bërë gjithnjë e më të rralla. Në prill të këtij viti, vajza e tij Lorraine publikoi një fotografi ku aktori shfaqej i buzëqeshur mes familjarëve dhe miqve, përfshirë këngëtaren Joni Mitchell.
Fitues i tri çmimeve Oscar dhe protagonist i filmave të paharrueshëm si The Shining, Chinatown dhe As Good as It Gets, Nicholson duket se ka zgjedhur një luks që Hollywood-i ua ofron rrallë yjeve të tij: të mos ketë më nevojë të jetë në skenë.
