Në Armeni, lufta kundër dhunës ka marrë një dimension të ri parlamentar. Vetëm një ditë pasi deputetët diskutuan ashpërsimin e masave kundër dhunës në familje, përfaqësuesit e mazhorancës dhe opozitës vendosën të japin një demonstrim praktik të asaj që ligji synon të parandalojë.
Seanca e 29 tetorit në Parlamentin armen u shndërrua në një përleshje mes deputetëve, me grushte, shishe dhe karrige që fluturonin në sallë.
Gjithçka nisi gjatë fjalës së deputetit të mazhorancës Taron Chakhoyan, i cili bëri komente për familjarët e drejtuesit të opozitës Narek Karapetyan. Debati verbal përshkallëzoi shpejt dhe deputetët u ngritën nga vendet për t’u përballur fizikisht.
Sipas mediave armene, nënkryetari i Parlamentit Vahagn Aleksanyan hodhi një karrige drejt deputetëve të opozitës. Një deputet përfundoi me hundë të gjakosur, një tjetër me rrobat e grisura, ndërsa u kërkua edhe ndërhyrja e ambulancës.
Kryesuesi i seancës, Ruben Rubinyan, fillimisht refuzoi ta ndërpriste mbledhjen, duke deklaruar se dëshironte që të gjithë të shihnin çfarë po ndodhte. Më pas u detyrua të shpallte pushim dhe të thërriste punonjësit e sigurisë.
Ironia është se një ditë më parë, më 28 tetor, Parlamenti kishte diskutuar një paketë ndryshimesh ligjore për forcimin e mbrojtjes së viktimave të dhunës në familje dhe ashpërsimin e masave ndaj autorëve.
Projektligji parashikon edhe zgjerimin e programeve të rehabilitimit për personat që ushtrojnë dhunë.
Nuk dihet nëse deputetët që u përleshën do të kenë nevojë për një program të ngjashëm. Por Parlamenti armen dëshmoi se miratimi i ligjeve kundër dhunës është shumë më i lehtë sesa respektimi i tyre në sallën ku diskutohen.
