Procesi i regjistrimit të diasporës për zgjedhjet parlamentare të 11 majit ka nisur me një fluks të lartë aplikimesh, por edhe me probleme të theksuara në saktësinë e të dhënave. Sipas Komisionit Qendror të Zgjedhjeve (KQZ), rreth 35% e aplikimeve janë refuzuar deri tani, kryesisht për shkak të deklarimit të gabuar të adresës së vendbanimit jashtë vendit.
KQZ ka afat 5 ditë për të shqyrtuar çdo aplikim të paraqitur në platformën elektronike, duke e pranuar ose refuzuar atë. Emigrantët, të cilëve u refuzohet aplikimi, kanë të drejtë të riaplikojnë, pasi të korrigjojnë të dhënat e pasakta.
Fluksi i lartë i kërkesave ka vënë KQZ-në në garë me kohën për të përballuar dyndjen e emigrantëve që kërkojnë të ushtrojnë të drejtën e votës nga jashtë. Procesi po vijon me intensitet, ndërsa autoritetet i bëjnë thirrje aplikantëve të tregojnë kujdes të shtuar në plotësimin e dokumenteve.
