Pas ngjarjes së rëndë të atentatit me tre viktima në Shkodër, kryetari i Partisë Demokratike, Sali Berisha, thirri protestë të opozitës për t’u solidarizuar me qytetarët e këtij qyteti. Në një deklaratë publike, Berisha ka akuzuar kryeministrin Edi Rama për lidhje me krimin e organizuar dhe për përdorimin e bandave për të frikësuar dhe kontrolluar qytetin e Shkodrës.
“Jam këtu për të shprehur solidaritetin tim më të thellë me secilin qytetar të Shkodrës, të cilët Edi Rama përpiqet t’i mposhtë duke përdorur krimin dhe mafian më agresive, duke e bërë qytetin e tyre të pajetueshëm,” deklaroi Berisha.
Protesta e opozitës është thirrur të shtunën, ora 12:00, në Shkodër. Berisha e cilësoi protestën një akt të mosbindjes civile kundër dhunës së grupeve kriminale, për të cilat ai pretendon se kanë mbështetjen e qeverisë aktuale.
Sipas Berishës, qeveria e Ramës synon të kontrollojë votat nëpërmjet grupeve kriminale, përfshirë edhe të ashtuquajturit “Bajri” dhe grupe të tjera të përfshira në krimin e organizuar. “Shqiptarët e panë se votat e Edi Ramës ishin pazar me grupe kriminale dhe tani, pas diskreditimit, ai kërkon të sigurojë votat përmes bandave kriminale në Shkodër,” theksoi Berisha.
