Kryeministri Rama pas thirrjes së ambasadorit të BE-së në Shqipëri, Silvio Gonzato, për një dialog politik konstruktiv dhe gjithëpërfshirës kritikoi opozitën, duke e cilësuar si të pavullnetshme për dialog dhe duke shtuar se “është vetëpërjashtim absolut pa asnjë bazë faktike të lidhur me qasjen dhe qëndrimet tona.”
Rama shpjegoi se, sipas tij, një dialog kërkon angazhimin e të dy palëve, ndërsa opozita ka zgjedhur të vetëpërjashtohet. “Kur duhet të vallëzosh, duhen dy vetë, dhe nuk hidhet vallja nëse të dy nuk duan ta hedhin vallen. Është zgjedhje e tyre legjitime dhe zgjedhja për të vrarë veten politikisht është legjitime – nuk ndalohet dot,” deklaroi Rama.
Në përgjigje të komenteve të Ramës, ambasadori Gonzato përdori një metaforë për të shpjeguar pozicionin e tij. “E dua muzikën, por nuk mendoj se jam dirigjent i mirë,” tha ai, duke nënvizuar se kërkohet angazhim nga të dyja palët për t’i dhënë jetë dialogut.
Gonzato theksoi rëndësinë e pjesëmarrjes së opozitës në proceset vendimtare për të përparuar me reformat e nevojshme për Shqipërinë. “Ka mënyra për të shprehur mospajtimin dhe ndryshimin e mendimit. Shpresoj që do të gjendet një rrugë për të riangazhuar opozitën,” shtoi Gonzato, duke shprehur gadishmërinë e tij për të ndihmuar nëse kërkohet.
