Partia Drejtësi, Integrim dhe Unitet (PDIU) ka reaguar ndaj ndalimit nga policia të protestuesit Dilaver Nela, i cili goditi me vezë dhe kos Fredi Belerin. Në një status në Facebook, PDIU dënon veprimin e policisë për ndalimin e një qytetari të revoltuar ndaj Belerit, një individ i dënuar tre herë, një nga këto dënime për poshtërimin e simboleve kombëtare para Kuvendit të Shqipërisë.
“Dilaver Nela, protestues historik, u ndalua nga policia pasi e goditi me vezë dhe “spërkati” me kos Fredi Belerin, i cili erdhi në vendin tonë me kostumin e eurodeputetit grek,” shkruan PDIU. “Dënojmë veprimin e policisë së shtetit për ndalimin e një qytetari që proteston i revoltuar. Ai ka protestuar ndaj Fredi Belerit, një person me tre emra dhe tri dënime për burg, përfshirë poshtërimin e simboleve të Republikës së Shqipërisë para Kuvendit.”
Dilaver Nela, duke folur për mediat, deklaroi se do të vazhdonte të protestonte kundër Belerit dhe të tjerëve si ai, duke e quajtur atë një “hajdut që ka vjedhur votat, një kriminel që ka vrarë ushtarë në masakrën e Peshkëpisë, dhe një antishqiptar”.
PDIU kujton se, megjithëse Fredi Beleri është liruar me kusht pa përfunduar dënimin, ai ka folur sërish për “të drejtat e pakicës për vetëvendosje” – një deklaratë që PDIU e cilëson si shprehje të irredentizmit të një recidivisti anakronik dhe të papranueshme për çdo shqiptar. Kjo deklaratë, sipas PDIU-së, çoi edhe në anulimin e takimit të grupit parlamentar të PDIU-së me delegacionin e Parlamentit të BE-së, ku PDIU përmend praninë e Belerit si “renegat shqiptar.”
Ky nuk është reagimi i vetëm i PDIU-së. Partia refuzoi të marrë pjesë në takimin e delegacionit të dhjetë eurodeputetëve të Parlamentit Europian që ndodhen në Tiranë për Takimin e Stabilizim-Asociimit Shqipëri-BE me grupet parlamentare. Deputetja Mesila Doda, që pritej të përfaqësonte grupin parlamentar, nuk mori pjesë në takim për shkak të pranisë së Fredi Belerit.
PDIU ka shprehur vazhdimisht qëndrimin e saj kundër zgjedhjes së Fredi Belerit si kryetar i Bashkisë Himarë dhe sot eurodeputet që përfaqëson Greqinë. Sipas PDIU-së, qëndrimet e tij kanë qenë gjithmonë irredentiste ndaj shqiptarëve, kushtetutës dhe shtetit shqiptar.
PDIU deklaron se “njeriu me tre emra”, i përfshirë në masakrën e Peshkëpisë dhe i dënuar për dhunimin e simboleve kombëtare, ka dalë publikisht me flamurin e republikës së Vorio-Epirit të vitit 1914 dhe ka bërë thirrje për helenizimin e Jugut. Ai është dënuar së fundmi nga GJKKO me dy vjet burg për korrupsion aktiv në zgjedhje. Për PDIU-në, këto janë fakte të mjaftueshme për institucionet e sigurisë kombëtare, të drejtësisë dhe shtetin shqiptar që ta shpallin “Non Grata”.
