Përfaqësuesit e Parlamentit Europian (PE) kanë bërë thirrje që partitë politike në Shqipëri të votojnë me konsensus rezolutën për integrimin europian. Megjithatë, opozita ka refuzuar, duke kundërshtuar tekstin aktual të rezolutës që nuk përfshin amendamentet e tyre.
Delegacioni i PE-së ka paralajmëruar se një votë kundër do të dërgonte një sinjal negativ tek Këshilli Europian dhe mund të ngadalësonte procesin e integrimit të Shqipërisë në Bashkimin Europian. Nga ana tjetër, kreu i Grupit Parlamentar të Partisë Demokratike ka deklaruar se opozita mbështet integrimin europian, por nuk mund të votojë një tekst pa asnjë ndryshim që reflekton shqetësimet e tyre për situatën politike në vend.
Gjatë seancës, eurodeputeti italian u përpoq të gjente një zgjidhje të ndërmjetme duke kërkuar nga opozita të paktën të abstenojë, por edhe kjo kërkesë u hodh poshtë nga deputetja demokrate Jorida Tabaku. Ajo argumentoi se vota kundër është një përgjigje ndaj refuzimit të mazhorancës për të përfshirë amendamentet e propozuara nga opozita.
