Ministri i Brendshëm, Ervin Hoxha, ka reaguar për herë të parë lidhur me ngjarjen e rëndë në Shkodër, ku mbetën të vrarë tre persona
Ministri fillimisht hezitoi të jepte një përgjigje, por më pas ndaloi në hyrje të Kuvendit dhe deklaroi se të gjitha forcat e policisë kanë shkuar në Shkodër dhe se së shpejti do të ketë rezultate konkrete.
“Dje të gjitha forcat e policisë kanë shkuar në qytetin e Shkodrës për të bërë të mundur arrestimin e autorëve,” deklaroi ministri i Brendshëm, i cili së bashku me drejtorin e përgjithshëm të policisë nuk iu përgjigjën pyetjes: pse nuk mori policia masa pas denoncimit të të ndjerit Arlind Bushati, tre javë më parë, se ndaj tij ishte organizuar një atentat? Si ka mundësi që pas denoncimit, policia nuk zhvilloi asnjë ndalim apo hetim, ndërkohë që Bushati lëvizte rrugëve të qytetit me një makinë të armatosur? A mban dikush përgjegjësi dhe a ka nisur ndonjë hetim për këtë çështje?
Për të gjitha këto, drejtori i përgjithshëm i policisë dhe ministri i Brendshëm kanë detyrë t’i përgjigjen publikut, në një kohë kur Shkodra është shndërruar në një qytet ku bandat dhe krimi qeverisin lirshëm.
