Kreu i Grupit Parlamentar të Partisë Demokratike, Gazment Bardhi, ka deklaruar se nesër PD do të dorëzojë zyrtarisht në Kuvend një projektligj për statusin e minatorëve. Ky njoftim vjen si përgjigje ndaj kërkesave të vazhdueshme të minatorëve, të cilët kanë protestuar për të drejtat e tyre përpara Kuvendit.
“Çdo kërkesë e protestuesve është përkthyer në projektligj,” tha Bardhi për mediat jashtë Kuvendit, ku deputetët e PD po ndalohen nga Garda e Republikës për shkak të vendimit të Sekretariatit të Etikës për përjashtimin e tyre nga seancat për 40 dhe 60 ditë. Sipas Bardhit, PD ka marrë përsipër të përfaqësojë zërin e minatorëve dhe të sigurojë që kërkesat e tyre të marrin vëmendjen e duhur në Parlament.
