Seanca plenare e Kuvendit ka nisur mes masave të forta të sigurisë dhe protestës së qytetarëve jashtë godinës së Parlamentit. Për shkak të perimetrit të vendosur nga Policia e Shtetit, deputetët hynë në Kuvend pa u përballur me protestuesit.
Në hapje të seancës, kreu i Partisë Demokratike, Sali Berisha, kërkoi shpërndarjen e Parlamentit, ndërsa shmangu komentet për mandatin e tij. Seanca e sotme parashikon raportimin e shtatë institucioneve kushtetuese dhe të pavarura, mes tyre KLGJ, KLP, KLSH, Prokuroria e Përgjithshme, SPAK, Avokati i Popullit dhe ILD, pas shtyrjes së seancës së kaluar për shkak të tensioneve në sallë.
Debati politik u përqendrua te protesta jashtë Kuvendit, ku kreu i grupit parlamentar të PD-së, Gazment Bardhi, akuzoi mazhorancën për vendosjen e një perimetri të gjerë sigurie dhe përdorim të forcës ndaj protestuesve. Ai kërkoi ndalimin e menjëhershëm të dhunës policore dhe tha se deputetët nuk duhet t’u frikësohen qytetarëve.
Në përgjigje, kreu i grupit parlamentar të PS-së, Taulant Balla, ironizoi Bardhin lidhur me komentet për kostumin e tij dhe deklaroi se nëse opozita dëshiron të plotësojë kërkesat e protestuesve, duhet të dërgojë në burg Sali Berishën. Përplasja mes dy deputetëve u shoqërua me replika të forta, duke rritur tensionet në sallën e Kuvendit, ndërsa jashtë vijonte protesta e qytetarëve.
