Mungesa e drejtorit të Përgjithshëm të Policisë së Shtetit, Skënder Hita, solli shtyrjen e mbledhjes së Komisionit të Reformës Zgjedhore, pasi deputetët e opozitës kundërshtuan vijimin e diskutimeve pa praninë e tij.
Përfaqësuesit e opozitës kërkuan që mbledhja të zhvillohej në një moment tjetër, kur kreu i Policisë të ishte prezent, duke e konsideruar të domosdoshme pjesëmarrjen e tij për çështjet që lidhen me procesin zgjedhor.
Gjatë diskutimeve, deputetja demokrate Albana Vokshi u përplas me bashkëkryetarin socialist të komisionit, Damian Gjiknuri. Vokshi insistoi se mungesa e drejtuesit të Policisë nuk duhej anashkaluar, ndërsa Gjiknuri argumentoi se komisioni mund të vijonte punën edhe me përfaqësues të tjerë të institucionit.
“E mira do të ishte të ishte prezent drejtuesi i Policisë, por nuk jemi këtu për të zhvilluar një komision hetimor. Këtu jemi për të marrë një mendim se çfarë nuk ka shkuar mirë”, tha Gjiknuri.
Debati mes tyre u tensionua më tej pas batutave të Gjiknurit ndaj Vokshit, të cilat kjo e fundit i kundërshtoi duke i kërkuar të mos komentonte në mënyrë personale.
“Mua e dashur mos më thuaj”, reagoi Vokshi, ndërsa Gjiknuri vijoi me tone ironike duke thënë se përpiqej vetëm të “shtensiononte situatën”.
Në përfundim të diskutimeve, Komisioni i Reformës Zgjedhore vendosi shtyrjen e mbledhjes për një datë tjetër.
