Në Policinë e Tiranës janë shënuar sërish lëvizje të rëndësishme në strukturat drejtuese dhe operative, me një seri transferimesh që përfshijnë komisariatet dhe Policinë Rrugore të kryeqytetit.
Shefi i krimeve në Komisariatin nr.5 është transferuar në Vorë, ndërsa drejtuesi aktual i krimeve në Vorë ka kaluar në drejtimin e krimeve në Komisariatin nr.5, në një shkëmbim detyrash mes dy strukturave.
Ndërkohë, edhe në Komisariatin nr.1 është bërë një ndryshim në drejtim. Shefi i krimeve i këtij komisariati është transferuar në Policinë Rrugore të Tiranës, ku do të mbajë pozicionin në sektorin e aksidenteve.
Ndryshimet më të shumta janë regjistruar në Policinë Rrugore të Tiranës, ku rreth 20 efektivë të linjave dhe trafikut janë transferuar. Gjithashtu, janë lëvizur edhe 4 komandantë të trafikut dhe linjave. Ndër figurat kyçe, bie në sy transferimi i shefit të trafikut urban në Tiranë, Jetnor Shira, i cili është zëvendësuar nga Megian Ademaj.
Përveç këtyre lëvizjeve, disa oficerë të policisë gjyqësore (OPGJ) që shërbenin në Policinë Rrugore janë transferuar në struktura të tjera.
Arsyet e këtyre ndryshimeve ende nuk janë bërë publike nga autoritetet, dhe motivacionet mbeten të paqarta.
Kujtojmë se shtatë muaj më parë, Policia e Shtetit ndërmori një reformë të thellë me përzgjedhjen e 12 drejtuesve të rinj të qarqeve dhe 48 shefave të komisariateve në mbarë vendin. Megjithatë, gara për drejtuesit e departamenteve vijon të mbetet pezull, edhe pse sipas ligjit të ri për Policinë e Shtetit, duhet të zhvillohet një proces konkurrues për përzgjedhjen e tyre.
