Presidenti i Kolumbisë, Gustavo Petro, ka bërë një deklaratë të fortë përmes një postimi në rrjetin social X, duke pretenduar se grupi i Dritan Gjikës ka tentuar të organizojë një atentat ndaj tij. Ai shprehet se grupi i Gjikës kontrollon një rrjet prokurorësh dhe se janë autorët e vrasjes të një prokuror paraguaian.
“Ky quhet karteli i trafikut të drogës, me qendër në Abu Dhabi. Ata kontrollojnë një rrjet prokurorësh dhe, nëpërmjet CTI-së, portin e Buenaventurës. Ata janë autorët e vrasjes së prokurorit paraguaian Pecci dhe kanë arritur të mbulojnë autorët e vrasjes brenda prokurorisë. Ata kanë tentuar të më bëjnë atentat pa sukses”, shkruan Gustavo Petro.
Kujtojmë që Ministria e Brendshme e Ekuadorit njoftoi të hënën arrestimin e Dritan Gjikës, 47-vjeçar shqiptar dhe i shumëkërkuar ndërkombëtarisht për trafik droge, pastrim parash dhe krim të organizuar.
Arrestimi u realizua më 26 maj 2025 në Abu Dhabi, Emiratet e Bashkuara Arabe, gjatë një operacioni të përbashkët të Njësisë Kombëtare të Interpolit në Ekuador, në bashkëpunim me autoritetet e Abu Dhabit dhe me mbështetjen e platformës ndërkombëtare PAcCTO 2.0.
