Mijëra besimtarë myslimanë u mblodhën mëngjesin e sotëm në sheshin “Skënderbej” për të kryer faljen e Fitër Bajramit, por një ndryshim i papritur i orarit nga Komuniteti Mysliman Shqiptar ka sjellë pakënaqësi dhe ka lënë shumë besimtarë pa mundësinë për të përmbushur këtë rit të rëndësishëm.
Komuniteti Mysliman kishte njoftuar më herët se falja do të kryhej në orën 7:30, por drejtuesit e tij e nisën dhe përfunduan atë në orën 7:15, duke shkaktuar konfuzion dhe zemërim mes besimtarëve që mbërritën në kohën e lajmëruar zyrtarisht.
Ky veprim, i paprecedentë në organizimin e faljes së Bajramit, ka ngritur pikëpyetje mbi arsyet që çuan në këtë ndryshim të paqartë të orarit. Besimtarët e pranishëm shprehën zhgënjimin e tyre, duke kërkuar një shpjegim nga drejtuesit e Komunitetit Mysliman, të cilët ende nuk kanë dhënë një reagim zyrtar mbi situatën.
Fitër Bajrami është një ditë gëzimi, uniteti dhe reflektimi, por për shumë besimtarë shqiptarë, kjo festë u shoqërua me zhgënjim dhe pakënaqësi për shkak të këtij ndryshimi të papritur, që i privoi nga një nga momentet më të rëndësishme të ditës.
