Ministri i Brendshëm, Ervin Hoxha, tregohet i shkëputur nga realiteti i situatës së rëndë kriminale që ka tronditur Tiranën në 24 orët e fundit. Dy ngjarje të rënda, ku një 14-vjeçar humbi jetën tragjikisht pasi u godit me thikë gjatë një konflikti dhe një 28-vjeçar u ekzekutua me plumba në kokë dhe gjoks, kanë krijuar një klimë pasigurie dhe alarmi në qytet. Megjithatë, ministri nuk gjen kurajë të reagojë për këto incidente konkrete, që kërkojnë përgjegjësi dhe veprim të menjëhershëm.
Në vend që të përballet me urgjencën e situatës dhe të tregojë se institucionet po veprojnë për të garantuar sigurinë e qytetarëve, ai zgjedh të fokusohet në prezantimin e axhendave të tij të së ardhmes, duke u marrë me prezantimin e drejtorëve te rinj. Deklaratat e tij nga Shkodra, ku përmend “sfidat” dhe nevojën për forcimin e masave kundër krimit të organizuar, tingëllojnë të shkëputura nga realiteti dhe nuk ofrojnë asnjë siguri konkrete për qytetarët që ndihen të rrezikuar nga dhuna e përditshme.
"Në Shkodër, teksa prezantova drejtorin e ri të Policisë, oficerin e karrierës Fatmir Lleshaj, kërkova rritjen e forcës goditëse ndaj paligjshmërisë në tërësi, krimit të organizuar në veçanti dhe zbardhjen e ngjarjeve kriminale, me fokus të veçantë tek parandalimi i këtyre ngjarjeve duke vlerësuar me prioritet çdo informacion apo të dhënë që vjen nga inteligjenca apo qytetarët." shkruan ministri Hoxha
Kjo mungesë reagimi ndaj ngjarjeve aktuale tregon një largësi të thellë nga përgjegjësitë kryesore të Ministrisë së Brendshme.
