Ish-kryeministri Sali Berisha ka deklaruar se Partia Demokratike ka pasur bisedime dhe takime të rregullta me përfaqësues të ambasadave të vendeve perëndimore. Në një prononcim për gazetarët, Berisha sqaroi se, edhe pse takimet nuk janë bërë publike, ato zhvillohen në mënyrë periodike.
Berisha theksoi se kontaktet me ambasadat kanë qenë të vazhdueshme dhe zhvillohen sipas nevojës, qoftë në nivel ambasadorësh, qoftë në nivel zëvendësish. “Partia Demokratike është e hapur për përfaqësuesit e të gjitha vendeve demokratike,” u shpreh Berisha.
Duke iu referuar konkretisht ambasadës amerikane, Berisha përmendi se pas largimit të ish-ambasadores Yuri Kim, kontaktet kanë qenë normale dhe rutinë. Ai kritikoi Kim, duke e cilësuar atë si një nga ambasadoret më të korruptuara që ka shkelur në Shqipëri pas Romana Vlahutin.
“Konkretisht me ambasadën amerikane, pas largimit të Yuri Kim nga Shqipëria, që do hyjë në analet e diplomacisë si ambasadorja më e korruptuar që ka shkelur në tokën shqiptare pas Romana Vlahutin, kontaktet tona kanë qenë do të thosha periodike, normale,” përfundoi Berisha.
