Parlamenti pritet të nisë sot diskutimet maratonë për projektbuxhetin e vitit 2025, me një seancë që do të zgjasë deri vonë, ndërsa miratimi pritet të ndodhë të martën. Opozita ka deklaruar se do të marrë pjesë në debatet për buxhetin, por nuk do ta miratojë atë, duke paralajmëruar një protestë masive në ditën e miratimit, ku qytetarët do të bashkohen për të kundërshtuar buxhetin prej 8 miliardë eurosh. Në të njëjtën kohë, opozita do të dorëzojë disa amendamente që synojnë përmirësimin e situatës ekonomike të qytetarëve.
Projektbuxheti 2025 është më i madhi deri më tani dhe do të përdoret kryesisht për financimin e projekteve në zhvillim si rrugët Tiranë-Durrës, Elbasan-Qafë Thanë dhe Ndroq-Plepa. Ndërkohë, fondet për mbrojtjen sociale nuk do të shtohen dhe nuk parashikohet rritje pagash apo pensionesh për vitin e ardhshëm. Kryetari i grupit parlamentar të PD-së, Gazment Bardhi, kritikoi qeverinë për mungesën e rritjes së pensioneve, duke theksuar se pensionistët shqiptarë mbeten me të ardhurat më të ulëta në rajon, pavarësisht rritjes së të ardhurave buxhetore.
