Endri Shabani, një nga drejtuesit e “Nisma Thurrje”, ka replikuar ashpër me Sali Berishën, pasi ky i fundit kritikoi partitë e reja politike, duke i akuzuar për bashkëpunim me qeverinë. Shabani reagoi duke ironizuar dhe akuzuar Berishën për mbështetje të të njëjtit sistem që, sipas tij, ka dobësuar opozitën ndër vite.
“Vazhdojnë sulmet nga fronti anti-perëndimit. Ditën e djeshme, Berisha i tretë Para Erës Sonë, doli tek ballkoni i burgut dhe sulmoi forcat e reja. Pasi votoi sistemin zgjedhor që dobëson opozitën; pasi i votoi amnistinë që falte hajdutët e Ramës; pasi i mori Ramës disa leje ndërtimi, tha se ‘forcat e reja i bëjnë fresk Ramës, prandaj populli duhet të dallojë ‘opozitën e vërtetë,’” shkruan Shabani.
Ai vazhdoi më tej, duke theksuar se Berisha e ka mbajtur partinë e tij në opozitë për 20 vite dhe, sipas tij, po përgatitet ta mbajë edhe për 40 vitet e ardhshme. Shabani nënvizoi se qytetarët tashmë po kuptojnë se kush është pjesë e “tavës” së politikës së vjetër dhe kush kërkon ndryshimin e vërtetë.
Shabani e përfundoi replikën me ironi, duke theksuar se të rinjtë do të sjellin një ndryshim të vërtetë, ndërsa Berisha do të ketë mundësinë të bëjë një koalicion me Ramën, duke përfituar nga rritja e pensioneve. “E vetmja gjë që nuk po arrij të deshifroj është kjo akuza që ne i bëjmë fresk Ramës… në këto ditë dimri ky po e ngroh Ramën dhe ne po i fusim mornicat?!” përfundoi Shabani.
