Kryetari i Partisë Demokratike, Sali Berisha, mori pjesë në ceremoninë e organizuar nga Unioni i të Burgosurve Politikë, për të nderuar 80-vjetorin e vrasjes së 39 intelektualëve të Tiranës nga regjimi komunist.
Në fjalën e tij, Berisha premtroi sërish se çështjet e ish-të përndjekurve politikë do të jenë prioritete kryesore në programin e Partisë Demokratike.
"Nderimi im më i thellë për martirët e masakrës së tetor-nëntor 1944, për ata që sakrifikuan jetën për të luftuar regjimin më të egër diktatorial që Europa ka njohur në 46 vite. Ky nderim shkon gjithashtu për familjet e tyre, dhe për të gjithë të përndjekurit politikë. PD do të vazhdojë të ndjehet pafundësisht e detyruar ndaj kontributit të tyre, dhe çështjet e kësaj shtrese të nderuar do të jenë pjesë e programit të saj kryesor. Nderim përjetë kujtimit të martirëve të masakrës së terrorit të kuq në Tiranë", theksoi Berisha.
Megjithatë, kjo deklaratë është pak paradoksale, duke pasur parasysh se Berisha ka qenë për 13 vite kryeministër i Shqipërisë dhe gjatë kësaj periudhe nuk ka arritur të zgjidhë problemet kryesore të ish-të përndjekurve. Kjo detyrë, që duhej të ishte prioritet që në vitet e para të mandatit të tij, ka qenë gjithashtu një obligim i dyfishtë, pasi ka qenë dhe është kryetar i PD që lindi edhe si shpresë e atyre që vuajtën persekutimin gjatë regjimit komunist.
Por kreu i PD jo vetëm nuk e realizoi, sot mban ‘mëkatet’ e “persekutimit të dytë” ndaj ish-të përndjekurve politikë. Pas 34 vitesh, Berisha kërkon mbështetjen e tyre me premtime të vjetra për t’u bërë sërish kryeministër, ndërsa ish-të përndjekurit enden rrugëve herë herë me greva urie në kërkim të të drejtave që ua nëpërkëmbi sistemi i djeshëm dhe ky i sotmi.
