Arlind Qori, kryetari i Lëvizjes Bashkë, shprehu skepticizmin e tij lidhur me efektivitetin e reformës në drejtësi në Shqipëri. Në një intervistë për News 24, Qori theksoi se qëndrimi i tij është gjithmonë kritik dhe kërkues ndaj institucioneve, duke theksuar rëndësinë e mbajtjes së tyre përgjegjës për detyrat e paplotësuara.
“Nuk kam qenë asnjëherë cheerleader i ndonjë institucioni në Shqipëri. Për mua, qëndrimi ndaj institucioneve është t’u kërkosh llogari përse nuk po e bëjnë punën deri në fund. Janë të tjerë ata që duartrokasin mëngjes, drekë, darkë për institucionet e drejtësisë. Qëndrimi im është që institucionet e drejtësisë nuk po e bëjnë ende punën siç duhet,” deklaroi Qori.
Kritikat e tij për reformën në drejtësi përputhen me qëndrimet e kryetarit të Partisë Demokratike, Sali Berisha. Të dy udhëheqësit politikë duken të sinkronizuar në vlerësimet e tyre për arritjet dhe dështimet e reformës. Pavarësisht se SPAK ka shënuar disa rezultate të rëndësishme së fundmi, përfshirë ndjekjen penale të ish-drejtuesve të lartë të qeverisë, Qori mbetet i pakënaqur. Ky qëndrim është paksa i çuditshëm, duke marrë parasysh se një nga shtyllat kryesore të premtimeve të tij është lufta kundër korrupsionit qeveritar.
Përtej kritikave ndaj sistemit të drejtësisë, Qori ka qenë aktiv edhe në mbështetjen e grupeve të ndryshme shoqërore, përfshirë pensionistët. Ai synon të arrijë rezultate të larta në fushatën e ardhshme, duke shpresuar të zgjerojë ndikimin e Lëvizjes Bashkë në skenën politike shqiptare.
