Pas një seance maratonë që zgjati më shumë se 10 orë, Kuvendi i Shqipërisë pritet të votojë sot për buxhetin e vitit 2025. Diskutimet e djeshme u karakterizuan nga debate të forta, me fokus të veçantë te çështjet që prekin pensionistët. Buxheti i propozuar, me një vlerë prej 8 miliardë eurosh, është planifikuar të shërbejë kryesisht për vijimin e reformave dhe financimin e projekteve infrastrukturore aktualisht në zhvillim. Megjithatë, nuk përfshin rritje pagash apo fond të caktuar për rritje pensionesh në vitin e ardhshëm.
Opozita ka paralajmëruar protestë të madhe gjatë seancës së votimit. Kreu i Partisë Demokratike, Sali Berisha, ka bërë thirrje për mobilizim, duke e cilësuar projektbuxhetin si “buxheti i vjedhjeve”. Ai u ka kërkuar mbështetësve të tij të protestojnë kundër miratimit të buxhetit dhe të përpiqen të pengojnë këtë akt.
Seanca e sotme pritet të shoqërohet me tensione, ndërsa deputetët do të diskutojnë dhe vendosin për financat e shtetit për vitin 2025.
