Pas një seance maratonë në Gjykatën e Posacme të Apelit, masa e arrestit me burg për ish-presidentin Ilir Meta dhe detyrimi për paraqitje për deputeten Monika Kryemadhi u lanë në fuqi. Gjykata nuk mori në konsideratë asnjë prej argumenteve të ish-ciftit të bashkëshortëve, duke i detyruar ata të drejtojnë sytë drejt Gjykatës së Lartë.
Në përfundim të seancës, Monika Kryemadhi deklaroi se “prokurorët ishin të papërgatitur përballë fakteve që unë dje kam parë nga fashikujt e letërporosive nga SHBA, Çekia dhe Austria”. Deputetja e Partisë së Lirisë shkoi edhe më tej, duke hedhur akuza ndaj prokurorëve për manipulim të provave.
Ndërkohë, duke folur për jetën politike, Monika Kryemadhi paralajmëroi se me shumë mundësi nuk do të garojë në zgjedhjet parlamentare të 2025. "Nuk besoj se do të merrem më me politikë. Do merrem me sensibilizimin e opinionit publik kundër luftës së tretë botërore, që është fake news. Nuk mendoj se do kandidoj", tha Kryemadhi.
Deputetja theksoi gjithashtu se marrëdhënia e saj me Ilir Metën ka përfunduar. “Marrëdhënia ime bashkëshortore me Ilir Metën ka mbaruar. Nuk ka më kthim prapa", theksoi ajo. Monika Kryemadhi u largua nga ambientet e Apelit të Posacëm, duke paralajmëruar se do të kthehej sërish, me kallëzime të forta ndaj eksponentëve të mazhorancës.
