Partia Demokratike ka organizuar sot një protestë para Kuvendit për të kundërshtuar miratimin e buxhetit të vitit 2025. Megjithatë, edhe pse drejtuesit e kësaj force politike e kanë të thjeshtë duke bërë thirrje për protesta, njëri nga ballkoni dhe pjesa tjetër nga foltorja e Kuvendit, ata që i ka zënë halli janë demokratët e thjeshtë.
Kjo për faktin se pasditen e sotme ata nuk ishin të qartë se ku duhej të mblidheshin: poshtë ballkonit të Berishës, siç ka ndodhur në protesta të tjera, apo para parlamentit, ku duhej të ishte fokusuar protesta e sotme.
Berisha ditët e fundit kishte paralajmëruar një protestë masive, me fokus në kundërshtimin e buxhetit të vitit 2025, ndërsa tubimi u shpërbë në dy grupe. Disa protestues u mblodhën para Kuvendit, ku u lanë në shi edhe nga deputetët, ndërsa të tjerë ishin thirrur në protestën e zakonshme poshtë shtëpisë së Berishës.
Kjo ndarje e protestuesve, në rastin më të mirë, tregon një mungesë koordinimi dhe serioziteti nga ana e drejtuesve të Partisë Demokratike, të cilët duket se nuk janë të qartë për qëllimin e aksionit të tyre: të protestojnë kundër ligjeve të qeverisë Rama, apo të kërkojnë lirimin e liderit të PD-së, Sali Berisha.
