Ministria për Evropën dhe Punët e Jashtme ka reaguar sërish për rastin e aktivistit shqiptar Baki Goxhaj, i ndaluar nga autoritetet izraelite gjatë misionit të flotiljes “Sumud”, por pa sjellë asnjë informacion të ri konkret mbi gjendjen e tij.
Në një deklaratë me tone burokratike dhe formulime thuajse identike me ato të dy ditëve më parë, ministria njofton se “vazhdon të ndjekë me vëmendje e përparësi situatën”, ndërsa konfirmon se Goxhaj është transferuar në Izrael.
Sipas njoftimit, ambasada shqiptare në Tel Aviv është në kontakt me autoritetet izraelite dhe “së shpejti” pritet të zhvillojë një takim me Goxhajn për t’i ofruar asistencë konsullore dhe për të mundësuar kthimin e tij në Shqipëri.
Por ndryshe nga reagimet e disa qeverive europiane, të cilat dënuan publikisht ndalimin e aktivistëve dhe mënyrën e trajtimit të tyre nga autoritetet izraelite, diplomacia shqiptare ka zgjedhur deri tani vetëm formulat standarde administrative, pa asnjë qëndrim politik apo moral mbi ngjarjen.
