Bashkëshortja e aktivistit shqiptar Baki Goxhaj, Eriselda Balliu, i ka dërguar një tjetër mesazh Ministrisë për Evropën dhe Punët e Jashtme, pas publikimit të pamjeve të para të aktivistëve të ndaluar nga autoritetet izraelite.
Në emailin e saj, Balliu shprehet e shqetësuar për fatin dhe gjendjen shëndetësore të bashkëshortit, duke theksuar se është informuar se drejt varkës së tyre janë përdorur plumba plastikë.
“Pres që edhe përfaqësues të shtetit shqiptar të jenë më këmbëngulës për të mësuar rreth fatit të Bakiut dhe gjendjes së tij”, shkruan ajo.
Ajo kërkon gjithashtu që Ministria e Jashtme të mbajë një qëndrim zyrtar për atë që e cilëson si “trajtim abuziv dhe poshtërues publik” ndaj aktivistëve të ndaluar.
Në fund të mesazhit, Balliu falënderon ambasadën shqiptare për komunikimin e deritanishëm, por kërkon rritje të presionit diplomatik për të mësuar mbi fatin dhe lirimin e shpejtë të bashkëshortit të saj, Baki Goxhaj.
