Pamjet e aktivistëve të Flotiljes për Gazën të gjunjëzuar në tokë, me duart e lidhura pas shpine dhe të poshtëruar publikisht nga ministri izraelit i ekstremit të djathtë Itamar Ben-Gvir, kanë shkaktuar reagime të forta diplomatike në Europë.
Kryeministrja italiane Giorgia Meloni e cilësoi trajtimin e protestuesve, mes tyre edhe shtetas italianë, si “të papranueshëm”, ndërsa qeveria italiane njoftoi se po ndërmerr hapa urgjentë diplomatikë për lirimin e të ndaluarve dhe ka kërkuar zyrtarisht ndjesë nga Izraeli.
Ministria e Jashtme italiane bëri të ditur se do të thërrasë ambasadorin izraelit për sqarime formale mbi incidentin.
Edhe Franca reagoi ashpër, duke thirrur ambasadorin izraelit pas publikimit të videove nga porti i Ashdodit. Parisi kërkoi respektimin e të drejtave të aktivistëve dhe lirimin e shtetasve francezë të ndaluar.
Një nga reagimet më të forta erdhi nga Irlanda. Kryeministri irlandez Micheál Martin dënoi ndërhyrjen izraelite dhe kërkoi lirimin e menjëhershëm të shtetasve irlandezë që ndodheshin në flotilje.
Në mesin e të ndaluarve ndodhet edhe Margaret Connolly, motra e presidentes irlandeze Catherine Connolly. Presidentja deklaroi se ishte “krenare”, por edhe “thellësisht e shqetësuar” për fatin e saj dhe të aktivistëve të tjerë.
Reagim pati edhe nga Spanja, e cila dënoi ndërhyrjen izraelite dhe kërkoi lirimin e menjëhershëm të aktivistëve të ndaluar.
Kriza shpërtheu pasi vetë Ben-Gvir publikoi video ku shfaqej duke tallur aktivistët e lidhur dhe të gjunjëzuar në tokë. Në një moment ai dëgjohet duke thënë:
“Mirë se erdhët në Izrael, ne jemi zotët e shtëpisë”.
Pamjet kanë shkaktuar zemërim ndërkombëtar dhe kanë thelluar përplasjen diplomatike mes Izraelit dhe disa vendeve europiane.
Ndërkohë, Shqipëria vazhdon të mos ketë ende asnjë reagim publik politik pas publikimit të videove, edhe pse mes aktivistëve të ndaluar ndodhet edhe shqiptari Baki Goxhaj. Deri tani nuk ka pasur asnjë reagim nga qeveria apo opozita shqiptare pas pamjeve të rënda të publikuara nga porti i Ashdodit.
