Kryeministri Edi Rama, në një intervistë për median estoneze Postimees, deklaroi se mazhoranca ka vepruar drejt duke mos i hequr imunitetin Belinda Ballukut. Sipas tij, Prokuroria nuk e akuzon atë për korrupsion, por për keqmenaxhim të prokurimeve publike.
Rama tha se në Shqipëri askush nuk ka imunitet ndaj hetimeve dhe se çdo person, përfshirë edhe kryeministrin, mund të hetohet nga Prokuroria. Ai shtoi se roli i Parlamentit kufizohet vetëm në miratimin ose jo të kufizimit të lirisë së një individi dhe se, në këtë rast, nuk kishte arsye për një masë të tillë.
Në lidhje me Bashkimin Europian, Rama sqaroi deklaratën e tij për anëtarësimin e Shqipërisë pa të drejtë vetoje, duke thënë se qëndrimi i tij lidhet me nevojën për një Europë më funksionale dhe më efikase në vendimmarrje. Ai argumentoi se BE-ja nuk mund të vazhdojë të bllokohet nga vetoja e secilit shtet anëtar, sidomos me zgjerimin e mëtejshëm të unionit.
Gjatë intervistës, Rama veshi edhe kostumin e liderit global, ku foli për marrëdhëniet mes Europës dhe Rusisë, ku kritikoi Bashkimin Europian duke thënë se ka gabuar duke ia lënë SHBA-së rolin kryesor në komunikimin me Moskën. Ai u shpreh se BE-ja duhet të ruajë pozicionin e saj si fuqi globale dhe të mos delegojë rolin e saj në arenën ndërkombëtare.
