Kryetari i Partisë Demokratike, Sali Berisha, ka kërkuar nga deputetët demokratë që të mos pranojnë delegimin e interpelancave me kryeministrin anëtarëve të tjerë të qeverisë, ndërsa u kërkoi që Edi Rama duhet të paraqitet vetë në Kuvend.
Në deklaratën për mediat para mbledhjes me grupin parlamentar të PD, Berisha u shpreh se, Kushtetuta e përcakton qartë detyrimin e kryeministrit për t’u paraqitur në interpelancë dhe se çdo praktikë delegimi e kësaj përgjegjësie nuk duhet të pranohet nga opozita.
“Nëse neni 80 i Kushtetutës përcakton se kryeministri është i detyruar të paraqitet në interpelancë, asnjë deputet s’do pranojë delegimin e interpelancës. Kushtetuta nuk e njeh një gjë të tillë”, deklaroi Berisha, duke shtuar se në të kundërt, sipas tij, procesi do të degradojë deri te përfaqësimi nga nivele më të ulëta të administratës.
Ai theksoi gjithashtu se në rast se kjo praktikë vijon, opozita do të marrë vendimet e saj politike, duke e konsideruar të papranueshëm delegimin e interpelancave nga kryeministri apo ministrat te funksionarë të tjerë të administratës.
