Nuk arritën të gjejnë dot as një kandidat formal përballë Sali Berishës në garën për kreun e Partisë Demokratike, por demokratët duket se kanë gjetur një tjetër mënyrë për t’u përballur seriozisht me qeverinë: inteligjencën artificiale.
Vetëm dy ditë para zgjedhjeve për kryetarin e partisë, në selinë blu u prezantua departamenti i ri i inteligjencës artificiale, në një aktivitet ku ishte i pranishëm edhe vetë Sali Berisha. Gjatë takimit, Berisha foli për të rinjtë dhe risitë e teknologjisë, ndërsa më pas pjesëmarrës të tjerë në sallë diskutuan për prioritetet e inteligjencës artificiale në politikë.
Në prezantim u fol edhe për përdorimin e IA në hartimin e programit politik të PD-së, me idenë që programi i ardhshëm të ndërtohet në bashkëpunim me inteligjencën artificiale.
Berisha garantoi se PD do të bëjë përpjekje serioze për përdorimin sa më të gjerë të inteligjencës artificiale në shumë drejtime të veprimtarisë së saj, duke theksuar se objektivi madhor mbetet “urtësia artificiale” në shërbim të qytetarëve shqiptarë.
Sipas tij, transparenca sot nuk ekziston në Shqipëri, ndërsa përdorimi “mafios” i AKSHI-t ka sjellë probleme të mëdha me të dhënat e qytetarëve dhe me kadastrën.
“Sirena e transparencës bie në të katër anët”, deklaroi Berisha, duke shtuar se Partia Demokratike ka besim të plotë se transparenca do të jetë busulla e qeverisjes së ardhshme të demokratëve.
