Kryetari i Partisë së Lirisë, Ilir Meta me anë të një postimi në rrjetet sociale kujtoi sot gjyqtarin italian Paolo Borsellino, i cili u vra nga mafia në moshën 52-vjeçare më 19 korrik 1992. Meta shkruan se Borsellino dhe kolegu i tij, Giovanni Falcone, paguan me jetë për luftën kundër mafias.
Ai thotë se Shqipërisë i mungojnë prokurorë të tillë, duke shtuar se vendi është në një situatë ku “mafia ka shtetin e vet”.
“Paolo Borsellino, si kolegu i tij Giovanni Falcone, e pagoi me jetë, 32 vite më parë, luftën e drejtë kundër mafias! Në funeralin e Falcones ai iu drejtua prokurorëve më të rinj: “Unë i kam dhënë fjalën Falcones e do t’i shkoj deri në fund. Ju jeni me fat se nuk ia keni dhënë fjalën askujt. Por duhet ta dini se çdo njeri është i vdekshëm në këtë botë. I pavdekshëm është vetëm ai ideja e të cilit vazhdon të ecë me këmbët e të tjerëve edhe kur ai nuk jeton më. Ndaj Falcone është i pavdekshëm se nga sot ideja e tij do të ecë me këmbët e mia” Fjalë burri, patrioti, prokurori dhe siçiliani! Shqipërisë sot i mungojnë prokurorë të tillë ndaj jemi një shtet që nuk kemi mafian tonë, por ku mafia ka shtetin e vet. Përmbysja e pashmangshme!” - shkruan Meta në Facebook.
Ky postim i Metës vjen në një kohë kur ai ndodhet në hetim nga SPAK, të cilin në çdo dalje publike e sulmon. Mos ndoshta postimi i kreut të PL është mesazh kërcënues ndaj prokurorëve të Prokurorisë së Posaçme?
