Kryeministri në detyrë i Kosovës, Albin Kurti, ka reaguar pas tensioneve dhe përplasjeve në seancën e sotme të Kuvendit, ku u qëllua me vezë nga deputetja e AAK-së, Time Kadrijaj.
Në një deklaratë për mediat pas ndërprerjes së seancës, Kurti tha se është i gatshëm ta pranojë edhe këtë situatë nëse ajo i shërben arritjes së një marrëveshjeje politike mes partive.
“Unë nuk ankohem që ata hedhin vezë, unë ankohem që ata s’duan të takohen”, deklaroi Kurti, duke bërë thirrje për uljen e palëve në tryezën e bisedimeve.
Kurti theksoi se nuk dëshiron zgjedhje të reja dhe kërkoi që partitë politike të arrijnë një marrëveshje për formimin e institucioneve.
“Kemi nevojë për takime, për marrëveshje. Duhet të evitojmë zgjedhje të reja. Nuk ia vlen, as për buxhetin, as për shtetin dhe as për popullin, përsëritja e zgjedhjeve”, tha ai.
Sipas Kurtit, përsëritja e zgjedhjeve nuk do të sillte një rezultat të ndryshëm, pasi programet dhe kandidatët do të mbeteshin të njëjtë. Ai u bëri thirrje partive që të shfrytëzojnë kohën në dispozicion për të arritur një marrëveshje politike.
