Teksa afati i përcaktuar nga Gjykata Kushtetuese për konstituimin e Kuvendit të Kosovës po shkon drejt skadimit, presioni politik është shtuar, me Lidhjen Demokratike të Kosovës dhe Aleancën për Ardhmërinë e Kosovës që kërkojnë vazhdimin e seancës konstituive brenda mbrëmjes së sotme, ndërsa kryeministri në detyrë dhe lideri i Lëvizjes Vetëvendosje, Albin Kurti, i ka bërë një ofertë të re Partisë Demokratike të Kosovës.
LDK ka kërkuar që seanca konstituive të vazhdojë sonte, duke paralajmëruar se mosrespektimi i afatit të Gjykatës Kushtetuese mund ta fusë vendin në një situatë të paqartësisë kushtetuese dhe mungesës së legjitimitetit institucional. Sipas partisë, konstituimi i Kuvendit brenda afatit është detyrim kushtetues dhe mosvazhdimi i seancës u pamundëson deputetëve ushtrimin e mandatit të tyre.
Në të njëjtën linjë është shprehur edhe Aleanca për Ardhmërinë e Kosovës. Shefi i Grupit Parlamentar të AAK-së, Besnik Tahiri, bëri të ditur se, në koordinim edhe me grupe të tjera parlamentare, është kërkuar mbajtja e një seance të jashtëzakonshme sonte në orën 22:30, me synimin që procesi i konstituimit të përfundojë para skadimit të afatit.
Ndërkohë, Albin Kurti i është drejtuar me një letër kreut të PDK-së, Bedri Hamza, duke e ftuar sërish për takim dhe duke propozuar një kompromis politik. Kurti tha se, edhe pse respekton vendimin e PDK-së për të qëndruar në opozitë, konstituimi i Kuvendit dhe zgjedhja e presidentit kërkojnë bashkëpunim mes partive.
Në letrën e tij, ai ofroi një rokadë mes postit të kryetarit të Kuvendit dhe atij të nënkryetarit, duke propozuar që PDK të marrë drejtimin e Kuvendit në këmbim të pjesëmarrjes në procesin e zgjedhjes së presidentit të ri, për të shmangur zgjedhjet e parakohshme.
Megjithatë, Bedri Hamza e refuzoi ofertën, duke ritheksuar se PDK do ta ushtrojë rolin e saj në opozitë për shkak të dallimeve programore dhe konceptuale me Lëvizjen Vetëvendosje.
Në këto rrethana, mbetet për t'u parë nëse gjatë orëve të mbetura do të ketë një marrëveshje politike që do t'i hapë rrugë konstituimit të Kuvendit, apo nëse Kosova do të përballet me një krizë të re institucionale.
