Administrata e Kuvendit të Kosovës ka njoftuar se seanca konstituive, e nisur më 6 gusht, do të vazhdojë nesër, më 8 gusht, në orën 11:00, në sallën plenare.
Procesi i konstituimit të legjislaturës së re mbeti i papërfunduar në seancën e parë, pasi kryetari i Lëvizjes Vetëvendosje, Albin Kurti, nuk propozoi kandidat për postin e kryetarit të Kuvendit.
Kurti deklaroi se për të vijuar me konstituimin e institucioneve duhet të arrihet fillimisht një marrëveshje politike edhe për çështjen e presidentit, e më pas të vazhdohet me zgjedhjen e kryetarit të Kuvendit dhe formimin e Qeverisë së re.
Seanca e së shtunës pritet të tregojë nëse partitë politike kanë arritur ndonjë dakordësi që do t'i hapte rrugë përmbylljes së procesit të konstituimit të Kuvendit dhe krijimit të institucioneve të reja të Kosovës.
