Takimi mes kryeministrit në detyrë dhe liderit të Lëvizjes Vetëvendosje, Albin Kurti, dhe kryetarit të Lidhjes Demokratike të Kosovës, Lumir Abdixhiku, ka përfunduar pa një marrëveshje për formimin e institucioneve të reja të Kosovës.
Dy liderët u takuan pas mbledhjes së Grupit Parlamentar të LDK-së, por edhe ky raund bisedimesh nuk solli një dakordim për krijimin e shumicës qeverisëse. Pas përfundimit të takimit, Kurti u shpreh shkurt para mediave.
"Nuk kemi lajme, përderisa nuk kemi marrëveshje. Kur ta realizojmë marrëveshjen, do të mund t’ju njoftojmë", deklaroi ai.
Ky ishte takimi i dytë brenda dy ditësh mes Kurtit dhe Abdixhikut. Edhe bisedimet e zhvilluara një ditë më parë, të cilat zgjatën rreth tre orë, nuk prodhuan një marrëveshje politike për ndarjen e përgjegjësive dhe krijimin e institucioneve.
Megjithatë, të dyja palët kanë lënë të hapur mundësinë e vazhdimit të negociatave. Kurti ka shprehur gatishmëri për bashkëpunim me LDK-në, duke e cilësuar atë si një mundësi për "progres të përshpejtuar", ndërsa Abdixhiku ka përsëritur se LDK kërkon një "balancë institucionale", ku asnjë forcë politike të mos kontrollojë të gjitha postet kryesore të shtetit.
Me mungesën e një marrëveshjeje edhe për çështje kyçe, përfshirë zgjedhjen e presidentit, mundësia e zgjedhjeve të reja vazhdon të mbetet në tryezë.
Ndërkohë, seanca konstituive e Kuvendit të Kosovës është parashikuar të mbahet nesër, në orën 10:00.
