Kryeministri në detyrë i Kosovës dhe njëherazi kryetari i Lëvizjes Vetëvendosje (LVV), Albin Kurti, zhvilloi këtë të martë një takim me kryetarin e Lidhjes Demokratike të Kosovës (LDK), Lumir Abdixhikun, në ambientet e Kuvendit të Kosovës, në kuadër të përpjekjeve për arritjen e një marrëveshjeje për formimin e institucioneve të reja.
Takimi zgjati rreth tre orë, por në përfundim të tij, Kurti deklaroi se palët nuk kanë arritur ende një marrëveshje politike.
“Sa i përket takimit me LDK-në, lajm do të ishte po të kishim marrëveshje. Marrëveshje politike nuk kemi. Kemi nevojë për një marrëveshje politike që respekton rezultatin zgjedhor. Askush nuk i do zgjedhjet e reja, por nëse nuk kemi marrëveshje, fatkeqësisht ato mund të shkaktohen. Do të përpiqemi maksimalisht dhe do të vazhdojmë komunikimin”, u shpreh Kurti.
Deklarata e tij vjen në një kohë kur forcat politike në Kosovë vijojnë negociatat për krijimin e institucioneve të reja pas zgjedhjeve, ndërsa mbetet e paqartë nëse do të arrihet një konsensus apo vendi do t’i drejtohet zgjedhjeve të reja.
