Komisioni i burgjeve nuk po arrin të vendos t’i japë apo jo leje Fredi Belerit që të shkojë të betohet si eurodeputet në Parlamentin Europian. Ky Komision është mbledhur për herë të dytë për ditën e sotme për të vendosur mbi kërkesën e Belerit për të udhëtuar drejt Strasburgut.
Komisioni i Burgjeve është mbledhur një herë paraditen e sotme, por që nuk mori një vendim.
Kujtojmë se kreu i PBDNJ-së, Vangjel Dule, ditën e djeshme tha se Fredi Beleri, i cili ndodhet në burgun e Fierit, e kishte marrë lejen dhe se do të udhëtonte të hënën në drejtim të Strasburgut, për të bërë betimin si eurodeputet i Demokracisë së Re në Greqi. Por, kjo është mohuar nga Drejtoria e Burgjeve, e cila po në një reagim ditën e djeshme, tha se leja për Fredi Belerin nuk ishte konfirmuar.
Mesa duket anëtarët e këtij Komisioni janë në pozita të vështira, pasi do të duhet të marin barën e e një vendimi që tregon qëndrim me dy standarte. Kjo pasi Belerit iu refuzua kërkesa disa herë për t’u betuar si kryetar Bashkie në Himarë, ndërkohë në rastin e rradhës kur i duhet që të betohet si eurodeputet, gjasat janë që t’i jepet leja.
