Një nga speciet e rralla të peshkaqenit Derrë ka rënë së fundmi në rrjetat e peshkatarëve të Qendrës së Peshkimit Oriku. Duke qenë të ndërgjegjësuar për rëndësinë e kësaj specieje të rrallë, peshkatarët kontaktuan menjëherë me specialistë të fushës për të marrë këshilla.
Sipas specialistëve, ky peshkaqen gjendet në thellësi mbi 300 metra dhe ushqehet kryesisht me vezët e peshkaqenëve të tjerë. Ky rast u shënua në zonën e Pashalimanit, një rajon i njohur për prani të shpeshtë të specieve të veçanta, ndoshta për shkak të rrymave unike që përshkojnë këtë zonë.
Duke pasur parasysh se peshkaqeni Derrë është një specie e mbrojtur, peshkatarët e Radhimës vendosën ta lëshojnë përsëri në det, duke dhënë kështu një shembull të shkëlqyer të kujdesit për biodiversitetin dhe mjedisin detar.
