Gjatë natës, reshjet e borës kanë vijuar me intensitet të lartë në juglindje të vendit. Sipas informacionit të marrë, në zonat malore mbi 1200 metra, trashësia e borës varion nga 50 cm deri në 60 cm. Konkretisht, në Dardhë trashësia ka arritur në 50 cm, por nuk ka pasur probleme me qarkullimin, pasi segmenti është hapur, edhe pse kërkohen goma dimërore për të kaluar. Në Voskopojë, trashësia ka arritur në 20 cm, ndërsa edhe atje nuk ka pasur probleme në qarkullim.
Në fshatin Panarit, trashësia e borës në Mashkullorë ka arritur 60 cm, ndërkohë që do të ndërhyhet me borëpastruese për të mbajtur rrugët të kalueshme. Po ashtu, në akset nacionale nuk janë regjistruar probleme dhe të gjitha rrugët janë të kalueshme. Megjithatë, qarkullimi në rrugën e re të Ersekës është ndaluar dhe për të shkuar në këtë qytet, duhet të përdoret rruga e vjetër.
Nga ana tjetër, reshjet kanë shkaktuar edhe probleme në furnizimin me energji elektrike. Në Vithkuq, 6 abonentë janë pa energji, ndërsa 2 kabina kanë pësuar defekte në Brozdovec të Lekasit. Po ashtu, në zonën e Çervenakës dhe Gur të Kuq, 12 abonentë dhe 160 abonentë në Podgozhan kanë mbetur pa energji. Në Pustec, rreth 570 abonentë kanë mbetur pa energji, përfshirë Goricën e Madhe, Goricën e Vogël, Kallamas dhe Gollomboç.
Situata është veçanërisht e vështirë në Devoll, ku 3210 abonentë janë pa energji elektrike, përfshirë zonat e Dardhës, Mollasit, Gjançit dhe Lavdarit, ku 270 abonentë janë pa energji. Po ashtu, ka probleme edhe në Panarit dhe Lozhan të Maliqit, ku përkatësisht 50 dhe 100 abonentë janë pa energji.
Në total, më shumë se 4000 abonentë janë pa energji elektrike në juglindje të Shqipërisë. Grupi i punës është në terren për riparimin e defekteve, por vështirësitë e rrjetit në zonat malore e bëjnë riparimin më të vështirë dhe mund të shtrijë kohëzgjatjen e mungesës së energjisë elektrike.
