Një ngjarje tragjike ka tronditur qytetin e Tolentino-s në Itali, ku një grua shqiptare është vrarë me thikë në mes të një parku, para syve të kalimtarëve, nga ish-bashkëshorti i saj.
Viktima është Gentiana Hudhra, 45 vjeçe, nënë e dy vajzave të moshës 21 dhe 23 vjeç, e cila punonte si kujdestare. Në momentin e sulmit, ajo po shkonte drejt vendit të punës. Sipas dëshmive të mbledhura, autori i krimit është ish-bashkëshorti i saj, 55 vjeç, me të cilin ajo ishte ndarë për tre vite.
Kur karabinierët mbërritën në vendngjarje, burri ishte ulur i qetë në një stol dhe nuk bëri rezistencë. Dëshmitarët raportuan se ai tha: “Bëra atë që duhej të bëja”. Një dëshmitar tjetër tregoi për mediat se kishte dëgjuar një britmë dhe kur doli nga bari pa gruan e shtrirë në tokë, ndërsa ish-bashkëshorti vazhdonte ta godiste me shkelma.
Ende nuk është caktuar asnjë masë paraprake për autorin, i cili, sipas informacioneve fillestare, vuan nga probleme psikiatrike. Ai po mbahet në pritje të mbërritjes së prokurorit publik për hetimet e mëtejshme.
Ngjarja ndodhi rreth orës 20:00 në parkun e Via Bennaduci, një zonë shumë e frekuentuar në qytetin e Tolentino-s, ku disa persona dyshohet se kanë parë me sytë e tyre këtë skenë tragjike.
