Prokuroria e Fierit përfundoi hetimet dhe dorëzoi për gjykim mjekun dhe infermierin për ‘Korrupsion pasiv’ e ‘Shpërdorim detyre’ pasi dhanë metadon në kundërshtim me protokollin mjekësor.
Mjeku Lulzim Banushaj dhe infermieri Endri Mandro akuzohen për veprat penale ‘Korrupsioni pasiv i personave që ushtrojnë funksione publike” dhe “Shpërdorimi i detyrës”.
Në përfundim të hetimeve rezultoi se mjeku Banushaj, toksikolog ka lëshuar recetë për marrjen e medikamentit “Metadon” një shtetasi që ka pretenduar se është përdorues i lëndëve narkotike, pa pasur analizat e tij dhe pa rekomandimin e mjekut të familjes, përkundrejt përfitimit material.
Ndrërsa infermier Mandro i Sektorit të Shërbimit Parësor në NJVKSH Fier, akuzohet se në kundërshtim me detyrën e tij dhe protokollin mjekësor, i ka dhënë një shtetasi medikamentin “Metadon” në dyfishin e sasisë së përcaktuar, duke u mjaftuar vetëm me një recetë mjekësore, pa pasur kartelë mjekësore të pacientit që do të trajtohet me këtë medikament, përkundrejt përfitimit material.
