Xhelal Mziu, kandidat për deputet i PD-së në qarkun Dibër do të hetohet nga SPAK bashkë me nipin e tij, pasi ka goditur një punonjës të njësisë administrative Ostren.
Ndaj Mziun është ngritur akuza e kanosjes dhe dhunimit ndaj pjesëmarrësve në zgjedhje. Ngjarja ka ndodhur në fund të një takimi elektoral në këtë njësi, ku Mziu dhe nipi i tij kanë kërkuar llogari nga Kalosh Murra pse qëndronte në ambjentet e jashtme të njësisë. Ai iu është përgjigjur dhe ishte në punë dhe në këto momente ata dyshohet ta kenë goditur.
Njoftimi
Bulqizë/Specialistët për Hetimin e Krimeve të Komisariatit të Policisë Bulqizë referuan materialet në SPAK, për veprën penale "Kanosja apo dhunimi ndaj pjesëmarrësve në zgjedhje", për shtetasit Xh. M., 58 vjeç dhe E. M., 36 vjeç, xhaxha e nip, të dy banues në Tiranë, sepse rreth orës 13:00 të datës 24.04.2025, pas një takimi elektoral të zhvilluar nga subjekti politik “Partia Demokratike”, në fshatin Ostren, dyshohet se kanë goditur me grushte, shtetasin K. M., 33 vjeç, banues në Shupenzë, në ambientet e jashtme të njësisë administrative Ostren.
