Florenc Doka, drejtori i burgut të sigurisë së lartë në Peqin, ka dhënë dorëheqjen nga posti i tij. Ende nuk janë bërë publike arsyet që çuan në largimin e Dokës nga detyra, por mësohet se ai ka dorëzuar zyrtarisht kërkesën për dorëheqje, e cila është pranuar dhe miratuar nga Ministri i Drejtësisë.
Doka u emërua në krye të këtij institucioni në dhjetor të vitit 2023, pas arrestimit të ish-drejtorit dhe disa zyrtarëve të tjerë, të përfshirë në skandalin që pasoi vrasjen e të burgosurit Arben Lleshi nga Sokol Mjacaj brenda ambienteve të burgut.
Florenc Doka ka një karrierë të gjatë në sistemin penitenciar dhe ka qenë pjesë e administratës së burgjeve përpara se të merrte drejtimin e institucionit të Peqinit. Deri tani nuk ka një emër zëvendësues për pozicionin e lënë bosh.
