Gjykata e Posaçme e Apelit për Korrupsionin dhe Krimin e Organizuar la në fuqi vendimin e GJKKO-së, e cila shpalli të pafajshëm kryebashkiakun e Devollit, Eduard Duro, si dhe të pandehurit Vojsava Bregu, Astrit Seferkolli, Gazmend Haxhija dhe Gazmend Malo. Duro akuzohej për shpërdorim detyre, së bashku me katër vartësit e tij, në lidhje me dhënien e një lejeje dhe autorizimi për një shoqëri tregtare për ngritjen e një stacioni shitjeje karburanti në Devoll.
Sipas Prokurorisë së Posaçme, Duro dhe vartësit e tij i pajisën shoqërinë tregtare “Genci Petrol” sh.p.k me autorizim për tregtimin me pakicë të karburantit, në kundërshtim me ligjin. Prokuroria argumentonte se autorizimi ishte dhënë pavarësisht se, në vitin 2019, Inspektorati Kombëtar i Mbrojtjes së Territorit kishte vendosur prishjen e pikës së karburantit.
Ashtu si GJKKO, edhe Gjykata e Apelit, pas shqyrtimit të çështjes, arriti në përfundimin se fakti nuk përbën vepër penale.
